Studentët e Kolegjit UBT informohen për trendët e zhvillimit të produkteve në Telekom
15/07/2016Studentët e Kolegjit UBT, pjesëmarrës në ANV, kanë dëgjuar ligjëratën për trendët e zhvillimit të produkteve në telekomunikacion dhe qasjen e tyre të komunikimit me konsumatorin, nëpërmjet mediumeve digjitale.
Rinor Ahmeti, menaxheri produkteve në Telekomin e Kosovës dhe Uragan Alija, menaxher i komunikimit me konsumatorin dhe pjesën digjitale prezantuan para studentëve të Kolegjit UBT trendët në zhvillimin e produkteve në Telekom. Shpjeguan se si teknologjia është bërë pjesë e jetës dhe se si kompanitë duhet të orientohen drejt ofrimit të internetit, kudo dhe kurdo, me shërbimet më të avancuar për shkëmbim të dhënave.
Fokusi i prezantimeve ishte në zhvillimet në telefoninë mobile, në internet mobil, internet fiks e IPTV dhe portfolion e produkteve të Telekomit të Kosovës.
Pjesë tjetër e ligjëratës ishte përdorimi i teknologjisë në komunikim me konsumatorin, veçanërisht hapat e ndërmarrë nga Telekomi i Kosovës, në vitin 2015, për komunikim me konsumatorin, përmes rrjeteve digjitale dhe fokusit që t’i përgjigjen pyetjeve e kërkesave të konsumatorëve nën 5 minuta, që aktualisht ky trend në faqen e Vala-s mbahet edhe në kohën mesatare prej 3 minutash.