Studentët e Infermierisë apelojnë qytetarët që të mos konsumojnë duhan

31/05/2019

Pirja duhanit shkakton sëmundjen e mushkërive dhe llojet e ndryshme të kancerit, por pavarësisht këtyre fakteve në Kosovë vazhdon të jetë i lartë numri i atyre që e konsumojnë duhanin.

Duke qenë kështu, me qëllim të rritjes së ndërgjegjësimit kundër prijës së duhanit, studentët e Fakultetit të Infermierisë në UBT, zhvilluan aktivitete simbolike në sheshet kryesore të qytetit të Prishtinës.

 

Kalimtarët e rastit u apeluan nga studentët e UBT-së për lënien e duhanit, teksa simbolikisht atyre u është ofruar nga një mollë me moton jeto shëndetshëm.

Po ashtu, studentët nën shoqërimin e profesorëve kanë shpërndarë edhe fletëpalosje me përmbajtje informimi dhe sensibilizimi.

 

Aktivitetet janë realizuar për nderë të Ditës Ndërkombëtare të Duhanit, mbështetur nga grupi për Edukim dhe Promovim Shëndetësor në UBT.

 

Dita Botërore kundër Duhanit është shpallur si ditë nga vendet anëtare të Organizatës Botërore të Shëndetësisë, ku në vitin 1987, këto vende, u përpoqën të sensibilizojnë opinionin mbi dëmet dhe rreziqet e duhanit dhe të inkurajojnë reduktimin e prodhimit dhe konsumit të duhanit.