Studentët e Fakultetit Arkitekturë dhe Planifikim Hapësinor në UBT zhvilluan një vizitë studimore në kompaninë “Vëllezërit e Bashkuar” në Prizren

29/12/2022

Studentët e vitit të dytë të Fakultetit Arkitekturë dhe Planifikim Hapësinor në UBT, dega në Prizren, në kuadër të lëndës “Materialet në Arkitekturë”, të udhëhequr nga asistenti i lëndës, Driton Kryeziu, kanë realizuar një vizitë punë në kompaninë “Vëllezërit e Bashkuar” në Prizren.

Studentët përgjatë kësaj vizite u mirëpritën nga drejtori i kompanisë “Vëllezërit e Bashkuar”, Sefer Susuri, ku patën rastin të njihen me të arriturat e kompanisë, si dhe me rrugëtimin e saj ndërvite.

Pas vizitës në linjat e prodhimit të agregatit për beton, prodhimit të betonit të gatshëm dhe linjës për prodhimin e elementeve të parafabrikuara si: blloqe betoni për muratim, kubëza apo blloqe betoni për shtruarje dhe gurë anësor, studentët patën rastin të shohin edhe laboratorin e materialeve të ndërtimit në të cilin kryhen ekzaminimet e nevojshme si pjesë e kontrollit të brendshëm në lidhje me cilësinë e produkteve që ofron kjo kompani.