Punimi shkencor i studentit Arbias Shahini publikohet në konferencën ndërkombëtare IACyC2025

08/05/2025

Arbias Shahini, student i Fakultetit të Shkencave Kompjuterike në UBT, ka arritur një sukses në fushën e sigurisë kibernetike. Artikulli i tij shkencor, i titulluar “The Use of AI for Detecting Cyber Attacks in Web Applications,” është pranuar për botim në konferencën ndërkombëtare International Applied Cybersecurity Conference (IACyC2025), që do të mbahet në Stamboll, Turqi.

Ky punim, i mentoruar nga Prof. Dr. sc. Elissa Mollakuqe, adreson një nga sfidat më të mëdha të epokës dixhitale: sulmet ndaj aplikacioneve web. Shahini ka propozuar një qasje inovative përmes përdorimit të Inteligjencës Artificiale – duke aplikuar teknika të mësimit makinerik (ML) dhe mësimit të thellë (DL) – për të zbuluar dhe parandaluar sulme të tilla si SQL injection, XSS dhe kërcënimet e avancuara të vazhdueshme (APT).

Studenti Arbias Shahini paraqet një model që monitoron trafikun e aplikacioneve në kohë reale dhe përdor algoritme të avancuara si Random Forest, SVM, CNN dhe RNN për të analizuar të dhënat dhe për të identifikuar sjellje të dyshimta që mund të tregojnë një sulm kibernetik. Për më tepër, ai ka theksuar rëndësinë e përmirësimit të performancës së modeleve përmes teknikave si normalizimi, përzgjedhja e veçorive dhe trajtimi i të dhënave të paekuilibruara, duke e bërë sistemin më të saktë dhe efikas.

Konferenca IACyC2025, që është pjesë e programit Erasmus+ Mundus Joint Master Degree: Applied Cybersecurity (CyberMACS), është një ngjarje prestigjioze që mbledh studiues dhe ekspertë nga e gjithë bota për të diskutuar përparimet më të fundit në fushën e sigurisë kibernetike.

Ky kontribut shkencor nënvizon potencialin e Inteligjencës Artificiale në përmirësimin e sigurisë kibernetike dhe përfaqëson një hap të rëndësishëm në zhvillimin e zgjidhjeve inteligjente për mbrojtjen e aplikacioneve web.