Ish-studentja e Media dhe Komunikimit në UBT punësohet si gazetare në televizionin T7

19/11/2026

Rrugëtimi i studentëve të UBT-së drejt suksesit profesional është dëshmi e rëndësisë së një edukimi që ndërthur njohuritë akademike me përvojat praktike dhe përgatitjen për tregun e punës.

Elma Sylejmani, e diplomuar në Fakultetin Media dhe Komunikim në UBT, tashmë është pjesë e televizionit T7, ku ushtron profesionin e gazetares, duke bërë realitet synimin e saj për të ndërtuar karrierë në fushën e medias.

Gjatë studimeve në UBT, Elma ka zhvilluar njohuritë dhe aftësitë profesionale përmes ligjëratave, bashkëpunimit me profesorët dhe përvojave që i kanë mundësuar të njohë nga afër dinamikën e profesionit të gazetarisë.

Duke kujtuar periudhën e studimeve, ajo thekson se UBT ka qenë një pjesë e rëndësishme e formimit të saj akademik dhe personal.

“Studimet në Fakultetin Media dhe Komunikim kanë qenë shumë më tepër se ligjërata, provime dhe libra. Kanë qenë vite gjatë të cilave kam mësuar, jam rritur, kam zbuluar më shumë për veten dhe për profesionin që kam zgjedhur”, u shpreh Elma.

Angazhimi i saj në televizion dhe përvoja e përditshme në gazetari përfaqësojnë vazhdimësinë e një rrugëtimi që ka nisur gjatë viteve universitare, duke u shndërruar tashmë në një karrierë profesionale.

Historia e Elmës është një tjetër shembull i rrugëtimit të ish-studentëve të UBT-së drejt tregut të punës dhe dëshmi e rëndësisë së përgatitjes akademike, zhvillimit të aftësive praktike dhe guximit për t’i ndjekur synimet profesionale.