UBT pjesë e modulit ndërkombëtar COWEB VCL, bashkëpunim i gjerë për zhvillimin e turizmit të qëndrueshëm në Ballkanin Perëndimor

10/04/2025

Me datë 9 prill 2025, UBT iu bashkua hapjes zyrtare të modulit ndërkombëtar “Virtual Collaborative Learning” (VCL) të projektit COWEB, me titull “NextGen TransDinarica: Building Value for Sustainable Tourism in the Western Balkans”, i cili u zhvillua në platformën Microsoft Teams. Ky modul bashkoi 143 studentë, staf akademik dhe partnerë nga 9 shtete të ndryshme, për të ndërtuar ura bashkëpunimi ndërkulturor dhe për të adresuar sfida konkrete në fushën e turizmit të qëndrueshëm në rajon.

Ngjarja u moderua nga Dr. Esmir Demaj nga Universiteti Epoka, njëkohësisht menaxher i projektit COWEB, i cili përshëndeti pjesëmarrësit dhe prezantoi agjendën e modulit. Fokus i sesionit hyrës ishte prezantimi i nismës TransDinarica, një rrugë e përbashkët për biçikleta që përshkon kufijtë shtetërorë dhe synon të shndërrohet në një vlerë të shtuar për zhvillimin e qëndrueshëm rajonal. Prezantimi u mbajt nga Dr. Agim Kasaj (UET), duke theksuar rëndësinë e bashkëpunimit ndërkombëtar në ndërtimin e kësaj platforme turistike gjithëpërfshirëse.

UBT, si një nga institucionet pjesëmarrëse, vjen me përvojën dhe angazhimin e tij të dëshmuar në fusha të ndërlidhura si teknologjia, menaxhimi dhe zhvillimi ekonomik. Pjesëmarrja e studentëve dhe stafit akademik nga UBT përbën një mundësi të artë për të kontribuar në projekte me ndikim real në komunitet dhe për të përfituar nga një model mësimor inovativ që ndërthur mësimin virtual, shkëmbimin kulturor dhe punën në ekipe ndërkombëtare.

Gjatë sesionit, Dr. Mattis Altman nga TU Dresden prezantoi qasjen pedagogjike të modulit VCL, e bazuar në mësim situacional dhe ndërveprim sinkron e asinkron në ekipe të përziera. Qasja thekson zhvillimin e kompetencave profesionale, sociale dhe personale – aftësi thelbësore për angazhimin në projekte ndërkombëtare.

Një tjetër komponent i rëndësishëm i modulit është roli i E-Tutorëve, i prezantuar nga MSc Anisa Isufi (EPOKA University), të cilët do të lehtësojnë komunikimin, koordinimin dhe angazhimin e studentëve gjatë tetë javëve të modulit. Ndërkohë, Dr. Valentina Ndou nga University of Salento ofroi një hyrje në Business Model Canvas, që do të përdoret për të stimuluar mendimin strategjik, inovacionin dhe qasjen e orientuar drejt interesave të palëve të ndryshme.

Në përmbyllje të sesionit, pjesëmarrësit patën mundësinë të njoftohen me mjedisin virtual në MS Teams, të eksplorojnë kanalet e tyre të punës dhe të krijojnë kontaktet e para me bashkëpunëtorët dhe mentorët.

UBT është krenar që është pjesë e këtij konsorciumi ndërkombëtar, së bashku me institucione nga Shqipëria, Gjermania, Italia, Sllovenia, Kosova, Bosnje-Hercegovina, Mali i Zi, Tunizia dhe Gjeorgjia. Ky modul është një dëshmi konkrete e fuqizimit të bashkëpunimit ndërkufitar në Ballkanin Perëndimor dhe përgatitjes së një brezi të ri profesionistësh të aftë të mendojnë në mënyrë kritike, të veprojnë në mënyrë bashkëpunuese dhe të udhëheqin me vizion për një të ardhme të qëndrueshme.